Myanmar Agricultural Development Bank le Japan JICA i pehtlai in lothlo pawl nih lothlawhtuannak ah hman ding mi seh cawknak ca ah tangka sing zanga tiang cawi khawh a si tiah Chin ramkulh Agricultural Development Bank (Myanmar Layar Phunhphozi Bank) Manager U Kyaw Lwin nih June 26 ah The Hakha Post ah a chim.
“Mahle pawcawmnak cinthlaknak ah hman ding mi seh cawk a duh mi nih tangka sing zanga tiang cawi khawh a si. Zeidang riantuannak ca ah si lo in, hman ding mi seh cawknak ca ah a si lai. Seh ngan phun a si ahcun kum nga ah cham ding a si lai i voi nga in a cham lai. Cun seh fa mi a si ahcun kum thum ah cham a si lai. A karh cu zatuak 8 (8%) a si lai,” tiah Manager U Kyaw Lwin nih The Hakha Post ah a chim. JICA Tow Step Loan ti mi cu Jica nih pek mi kha Agricultural Development Bank nih lothlo pawl bawmh chin mi a si.
“Cawih ning ding cu a cawitu kha a tangka in pek si lo in, a cawk ding mi seh kha a duhnak company ah aa zoh lai i, cu company tu cu bank nih tangka a pekpiak lai. A cawk ding mi seh man i zatuak 30 (30%) kha bank ah a chiah hmasa lai. A chiah mi tangka i a karh zong a hmuh rih lai. A cham tik ah a cawi ni in kum khat a tlin ni ah then (voi) khatnak a cham lai. Cuti cun voi nga (kum) nga ah a cham dih lai. Cubantuk in kum thum ca a cawi mi hna ca zong ah aa khat ve,” tiah U Kyaw Lwin nih a chimchap.
A sok ding mi cu a lo (dum) kha pungsan (7) tha tein a ngei mi a si lai. Acre bitkauh rikhiah a um lo. A cawi tik ah amahkhanpiaktu minung pahnih a herh.
Hi tangka cawihnak hi Myanmar ram ah 2017 kum in Ramkulh le Ramthen kip ah cawih asinain Chin le Rakhine ah a cawitu an um lo. Hi a cawitu an umlonak kong hi khuami lothlo pawl nih fiang in a umtu ning an hngalh lo ca ah a si. Cucaah atu hi June 24 in 27 tiang Chin ramkulh peng kip bank riantuantu hna kha hi tangka cawih ningcang tintan an pek hna lio a si i hi tangka cawi ning fiang deuh in theih le hngalh a duh mi nih mahle peng cio bank riantuantu sin ah siseh, Ph.09-259175799 ah hlathlai khawh a si.###
