2021 kum January zarh thumnak tiang Chin Ramkulh chung ah inn 12 a kaang cang i, hi inn kangh ruang ah minung pali nunnak a liam tiah theih a si.
Hi inn a kaang mi hna hi Hakha ah inn thum, Mindat Peng ah inn khat, Falam ah inn ruk, Thantlang ah inn khat le Hakha Peng, Tinam khua ah inn khat hna an si. Inn 12 a kang mi chung ah a thi mi hna hi Falam in nu minung pahnih le Hakha in pa pakhat an si.
Inn 12 a kang mi chung ah Tinam, Thantlang, Falam le Mindat Peng chung in a kaang mi hna hi tappi meici in mei aa thok mi an si. Cun, Falam inn 6 le Hakha ah inn 3 hna hi cu Meithat Zung lei nih an thanh ning ah Electric meipung (Heater) in mei aa thok mi a si tiah an langhter.
Hakha inn a kaang mi hi 2021 January 9, Falam hi January 12, Mindat Peng hi January 13, Thantlang hi January 21 le Tinam hi January 22 hna ah an si.
Atu bantuk in Chin Ramkulh chung ah inn kangh a tam ruang ah le thal kan phak cuahmah ruang ah Pengkip i meithat zung rianngei hna zong nih mei i ralrin ding in mizapi sin ah chimh cawnpiaknak an tuah cuahmah tiah theih a si.
Photo/ Thantlang inn kaang mi
