Hakha hartong umnak Hakhathar ka inn saknak ca ah January 28 zaan ah Cawbuk lei in faar le thinghak ka cawk mi ka van phurh. Cawbuk Gate ah Palek maw an si Tittaw dah, zei kan si ti an i chim lo, cu hna nih “thong sawmnga chuah,” an ka ti i an ka thlah.
Cuti cun ka kal i Khuathar lonh Ko Aung datsi dawr pawng ah Mitat nih Palek kan si tiin an kan tlaih than. “Cawbuk ah an ka tlaih cang, thong sawmnga ka pek cang hna,” ka ti i an duh lo. Cawbuk Gate Palek/Titaw nih tangka an ka halnak voucher zong an ka pek lo ca ah piah awk ka ngei ti lo. Cuti cun ka pek duh ti hna lo ca ah “Duty a hngak mi kan si ca ah zu dinnak kan ngei lo, thong thum tein kan pe kun ne,” an ka ti i ka pek hna.
Hi a kan tlaitu hi Cozah minung Palek, Tittaw le Meithattu an si. Cozah nih fial mi maw an si anmah tangka kawlnak i a vaak mi dah an si? Cozah nih tuanvo pek mi an si ahcun ningcang tein, voucher, sil cumhpiak le tuanvo ngeitu minthut te he kan tuahpiak hna seh. Cun Cozah nih inn saknak ah thing hi zeitin dah a onh i zeitin dah a khap ti zong zapi theih tein thawngzamh ah kan thanhpiak ulaw kan duh.
Cun hi hna pawl hi Cozah nih tuanvo pek mi an si lo ahcun Cozah nawlngeihnak ningcang lo hmang in duh poh in rammi sin ah tangka kawl mi an si lai ca ah Chin Ramkulh Cozah lutlai nih fakpi in kan cawnpiak hna sehlaw a tha. Cu lo ahcun Democracy lampi lei kal lo in hlan Ralkap chan lampi hlun lei ah kan kir cuahmah cang hih! (Hartong minung pakhat)
Biakilh: Zapi aw hi The Hakha Post dirhmun a si lo.
