Hakha Sangthar samh mi asiloah inn hmun kong ah cheukhat nih an kan purhdah ngai, a taktak cu inn ka ngei ko, tinphaw kauh zong kaa laak lai lo, tiah Minister Pu Sui Thio nih May 12 ah a chim.
“Minung hi anmah bantuk ah an kan ruah tawn ko rua. Purhdah, zumhlo, eihmuar puh tibantuk tete kan ton ngai. Atu Sangthar samh mi hmun kong zong ah cu thiam a si. Midang nih hmun ngeih an i timh le timh lo cu ka hngal ve lo. Asinain, keimah dirhmun cu kan nunphung a si bal lo. Inn ka ngei ko. Kan si khawh tawk in mizapi ca rian kan tuan kan ti ah hin zumhlonak a tam ngaingai. Kei cu kan nunnak ah tlaihtleeng in ka hman peng mi cu, ‘Na tuh bantuk in na zuun lai,’ ti hi a si. Cucaah, zum loin kan um hlah u, kan lungrumh hlah u,” tiah The Hakha Post ah a chim.
Pasal ka biakam le ka tlahteem a si ko. Ka fale nih kan inn kha a kiken tuk deuh, khualai deuh ah inn hmun rak caw an ti i tangka an ka kuat khawh i ka cawk khawh ahcun kaa cawk te lai. Atu Sangthar kong ah lungrumh ding ka si lo, tiah The Hakha Post ah a chim fawn.
