India ram in a rak tlung mi Chin Ramkulh, Tedim mi kum 19 upa sin in COVID-19 hmuhchap a si i, nihin tiang ah Myanmar ram chung COVID-19 zawtnak ngei minung 357 an si cang tiah Ramkomh Ngandamnak le Zaanglek Zung nih 2020 August 5 suimilaam 8:00PM ah a thanh.
August 5 ca ah COVID-19 zawtnak chek mi hi Yangon NHL in minung 339, DMR ah minung 227, Mandalay PHL ah minung 172, Mawlamyine PHL ah minung 144, Yangon Ralkap sii-inn ah minung 85, dihlak fonh minung 967 zawtnak an chek hna i Chin pa pakhat sin ah zawtnak an hmuh.
Cun, zawtnak a ngei cia mi (old confirmed case) minung pathum Case-203, 240 le 327 hna cu voi hnih tiang zawtnak an chek than hnu ah negative a piah ca ah sii-inn in an chuahter cang hna lai.
August 5 tiang ah damnak a hmu than mi minung 305, sii-inn in chuahter cang mi minung 289 an si tiah kan theih.
Chin Ramkulh chung ah mizaw 15 an um i, hi mizaw 15 chung ah minung 11 nih damnak an hmu than cang sii-inn in an chuahter cang hna. Atu ah Tedim sii-inn ah mizaw 4 an thlop cuahmah tiah kan theih.
