Vawleicung pumpi ah a tlung cuahmah mi Coronavirus Disease- 2019 (COVID-19) in i runven khawh nakhnga India ram chung ah Lock Down an chiah mi cu 2020 March 24 in ni 21 chung chiah ding in India ram cozah nih nawl a chuah ca ah India ram um Myanmar ralzaam minung tampi harnak an tong tiah kan theih.
Atu bantuk in Lock Down in an chiah ca ah India ram New Delhi ah a um mi Chin ralzaam pawl hnipuan fenhaih, ei le din lei ah biatak tein harnak an tong tiah Delhi khuasa Chin mi pakhat sin in theih a si.
Hi kong he pehtlai in Delhi CHRO lutlai Salai Cung Dawt nih, “Delhi a um Chinmi a tam deuh hi Company le Local Factory ah rian a tuan mi kan si. Atu bantuk in Lock Down an chiah ca ah leng chuak in rian kan tuan kho lo. Cun, kanmah chung ahhin chun lawng ah riantuan si loin zaan ah a tuan mi zong kan um ve. Rian kan tuan khawh ti lo ca ah ei awk din awk a ngei lomi kan um lawng si loin inn man pek ding tangka zong kan ngei lo. Lock Down an chiah hi a caan zong a rau rih lo nain atu hmanh ah harnak kan ton ning hi a fak ngai cang. Ni 21 tiang a ni an thanh ca ah tu hi lungrethei in kan um ko,” tiah The Hakha Post ah a chim.
COVID-19 ruangah India lawng si loin Chin ralzaam umnak Malaysia zong April 14 tiang Lock Down an chiah ve i Chin ralzaam cheukhat harnak an tong. Cun, Laitlang chung in Zahnak tlang Dawn khua zong 2020 March 28 in Lock Down an chiah lai tiah kan theih.
Cun, “Kanmah chung ah Australia Visa a hngak mi minung tampi an um. Visa a hngak mi chung ah zung nih Interview a auh mi zong an um. Cun, Visa a hngak mi chung in a tam deuh hi cu tu March thla dong hrawng ah a lan ding khi an tam. Harnak a tong mi hna ca ah kanmah UNHCR sin zong ah bawmh a hal mi hi an tam pah ngai ca ah 2020 March 26 lakhruak in UNHCR he Online meeting kan tuah. Hi meeting ah harnak a tong mi min cazin lak in fund a um a si ahcun bawmhnak pek ding tiah bia kan chah. ,” tiah a chimchap.\
` Australia chungkhar auhnak Humanitarian Visa a hngak mi minung 300 leng an si i, Delhi ah khua sa mi Chin mi minung 3500 leng an si.
