India ram in a rak tlung i Chin Ramkulh, Tedim Peng, Dimpi khua ah Facility Quarantine in chiah mi pa pakhat cu June 26 zinglei sang ah a nunnak a liam tiah Tedim sii-inn-uk Dr. Zaw Myint Naing sin in thawng kan theih.
A thi mi pa hi Dimpi khua ah June 10 in Facility Quarantine ah an chiah mi a si i, June 25 ni ah a taksa linhsat ning zualhma lei a panh ca ah Tedim sii-innpi ah an kalpi mi a si.
“June 25 kha a taksa linhsat ning a zualhma deuhdeuh ca ah Tedim sii-innpi ah kalpi a si. Sii-inn ah zaan khat cu an thlop manh. A kan liamtak mi kan unaupa hi raifanh zawtnak a ngei cang mi a si,” tiah Tedim COVID-19 Emergency Committee Volunteer in Saya CS Mung No nih The Hakha Post ah a chim.
Athi mi pa hi Tedim khuapi CMBC thlaan ah a thih lecangka in rian ngeitu hna nih a ruak an vui. Cun, COVID-19 zawtnak a ngeih le ngeih lo zong National Health of Laborious (Yangon) ah an kuat lio a si tiah thawng kan theih.
Dimpi khua hi Tedim khuapi in meng hnih aa hlatnak ah a um mi a si i, a thi mi pa he naihniam in a um mi minung 4 zong Facility Quarantine ah an chiah hna tiah kan theih.
