India ram ah Bible sianginn kai mi minung 17 le riantuan mi 15, an diklak 32 cu Rih Khawdar tiang Chin Ramkulh Cozah Social Affairs Minister Pu Pau Lun Min Thang nih a va don hna lai, tiah kan theih.
“A rak tlung ding mi hna hi Social Affairs Minister Pu Pau Lun Min Thang nih Rih Khawdar tiang a va don hna lai. Mizoram Cozah nih ramri tiang tuanvo a hun lak hna lai i kannih Chin Ramkulh Cozah nih ramchung cu tuanvo kan laak ve hna lai. Amah belte, COVID-19 lio a si tik ah India ram maw, Mizoram Aizawl tibantuk ah Quarantine an um bal ahcun Minister nih maw, Ngandamnak Zung nih maw theihpinak ca a ngei mi cu a si khawh chung in kan tuaktanpiak hna lai. Asinain, Quarantine a rak um bal lo mi cu Rih Khawdar ah ni 21 Quarantine chiah an si ve lai. A hlankan tein Rih Khawdar ah hin minung 40 Quarantine chiah khawhnak hmun kan timhtuah cang,” tiah Chin Ramkulh Cozah Chimphuannak Nawlngeitu Sipin le Electric Minister Pu Soe Htet nih The Hakha Post ah a chim.
A rak tlung ding mi hna hi Magwe, Kalay le Yangon tibantuk tiang an i tel i minung 32 an si. Hi hna kir an duhnak kong hi CNLD Chairman Pu No Than Kap nih Chin Ramkulh Cozah sin ah ca a kuat i an tawlrel mi a si, tiah kan theih.
