India cozah tang ah a ummi Think Tank bu “India Council of Word Affiars” (ICWA) nih NUG tel in Chin, Rakhine le Kachin hriamtlai pawl cu atu kum November thla ah tuah dingmi ceihhmainak (Seminar) ah i tel ve ding in a sawm hna, tiah Reuters thawngzamhnak nih a ṭial.
KIA le AA cu sawmmi lak ah an i tel tiah minfangkheh in Reuters, The Print le First Post thawngzamhnak hna nih an langhter.
‘NUG le Chin, Rakhine, Kachin hriamtlai hna sawm an si’ tiah an langhter ko nain zei bantuk Chin hriamtlai timi minfangkheh in langhtermi a um lo.
CNF Vice Chairman II Dr. Sui Khar nih, “Kannih (CNF) zong palai kan thlah lai. Atutan hi India nih non-state actors (acozah he pehtlaihnak a ngei lomi phu pawl) ton ding in a voi khatnak bik sawmnak a tuah a si lai. Thil ṭha ngai a si,” tiah Reuters thawngzamhnak ah a chim.
NUG, Chin, Kachin le Rakhine hraimtlai pawl a sawmtu ICWA hi India ramleng vuanci zung he naihniam tein rian a ṭuanmi bu a si, tiah theih a si.
November thla ah ICWA nih a tuah dingmi Seminar ah hin Federal kong le Constitution kong ceihhmainak an ngei lai, tiah The Print thawngzamhnak nih a langhter.
