India le Myanmar karlak zalong tein tlawnkai khawhnak (Free Movement Regime-FMR) hrawh ding le ramri ah hauhruang ser ding in India cozah nih bia a chah caah cu biachahnak cu ruahpiak ṭhan ding in Mizoram chung NGO bu fonh nih India cozah sin ah hal an timh, tiah theih a si.
A luancia 1970 ah khan India le Myanmar ramri zalong te in tlawnkai khawhnak (FMR) hnatlaknak cu Myanmar cozah le India cozah nih an rak ser.
Cu hnatlaknak ning ah cun Visa hau lo in Myanmar rammi hna nih ramri in India ramchung meng 10 (16km) tiang hi zalong tein tlawnkai khawh a si. India rammi hna zong nih Visa hau lo in ramri in Myanmar ramchung meng 10 tiang zalong tein tlawnkai khawhnak nawl an ngei.
COVID-19 zawtnak a chuah hnu ah FMR hnatlaknak cu ngol chung a si. COVID-19 zawtnak a dih cang nain India ramchung humhimnak ca ah ti in India cozah nih FMR hnatlaknak cu atu bantuk in a hun hrawh hi a si.
India Home Minister Amit Shah nih, “India-Myanmar karlak zalong te in tlawnkai khawhnak FMR hrawh ding in Ministry of Home Affiars nih bia a chah cang. India ramchung humhimnak ruat in atu bantuk in bia a chah hi a si,” tiah nihin February 8 ah Twitter cahmai ah a ṭial.
India Ministry of Home Affiars nih FMR hrawh ding in bia a chah bang in India Ministry of External Affiars zong nih FMR hrawhnak kong a tawlrel cuahmah lio a si ve.
India cozah nih FMR a hrawh pin ah meng 1,000 leng a sau mi India-Myanmar ramri ah hauhruang ser dih ding in timhtuahnak a ngei.
Cucaah, Mizoram chung ah a ngan bik an ti mi NGO hna, Central Young Mizo Association (CYMA), Mizo Zirlai Pawl (MZP), Mizo Students’ Union (MSU), Mizoram Upa Pawl (MUP) le Mizo Hmeichhe Insuihkhawm Pawl (MHIP) nih ramri hauhruang sernak kong le FMR kong cu ruahpiak ṭhan ding in India Central Cozah sin ah halnak tuah an timh.
A cunglei bu vialte hi NGO Coordination Committee (NGOCC) ah an i funtom hna hi NGOCC min in India Central Cozah sin ah ramri kong chimrelnak ngeih ding in timhtuahnak an ngeih hi a si.
Myanmar-India ramri hauhruang sernak nih unau thisen khat a si mi Chin (Zo) miphun karlak naihniam te in pehtlaihnak a hrawh lai i, miphun ṭhencheunak a chuahpi lai. Cucu kan cohlang kho lo, tiah NGOCC nih an dirpi.
