India-Myanmar ramri pehtlaihnak hlei cung ah Chin miphun thantar cu nihin November 14 ah Chin ralkap hna nih an tar khawh cang, tiah thawng kan theih.
India-Myanmar ramri khua a simi Falam peng, Rihkhawdar cu November 13 ah CNA, CDF-Hualngoram, CDF-Zanniatram, PDA le CDF-Thantlang nih tlamtling tein an lak khawh hnu ah atu bantuk hin thantar an tar khawh hi a si.
Kap hnih kahdohnak ah SAC ralhrang a thi mi milu zat cu fiang in theih a si rih lo nain SAC ralkap Major pakhat telh in ralkap 7 nih Chin ralkap sin ah hriam an chiah i, India ramchung Zokhawthar lei ah SAC ralkap 30 leng zong an zaam, tiah CNA chimnak nawlngei Salai Htet Ni nih a chim.
Rihkhawdar kahdohnak ah SAC nih Fighter Jet le Helicopter a hman hna i ralzaam minung pakhat a nunnak a liam pin ah khuami 20 hrawng zong hliamhma an pu, tiah thawng kan theih.
———————–
