Mizoram in Chin Ramkulh, Falam Peng, Rihkhawdar khua ramri gate in a rak tlung mi Myanmar rammi minung 10 cu Kalay le Tedim ah Facility Quarantine chiah ding in an kuat hna, tiah kan theih.
“Hi India ram in a rak tlung mi hna hi pa 6 le nu 4 an si i, August 12 ah India le Myanmar ramri gate No.2, Rihkhawdar in Rihkhawthar hauka in ram hnih lungtlinnak he a rak tlung mi an si,” tiah Rihkhawdar Thawngthanhnak Zung lutlai Pu Lalpeklawma nih The Hakha Post ah a chim.
“An dihlak in minung 10 an si i, pakhat cu Tedim Facility Quarantine ah kan kuat cang. A taang mi minung 9 hi Kalay ah kuat an si. Anmah zong nih Myanmar ram tuanvo ngeitu hna bawmh an kan hal, Mizoram lei tuanvo ngeitu hna zong bawmh an hal ve hna tik ah, kan cohlan mi hna si,” tiah a chimchap.
Hi Facility Quarantine chiah ding in kuat mi hna hi, Chin Ramkulh, Falam Peng, Sa-ek, Tlangzawl, Phunte, Ramthlo le Sagaing Ramthen, Kalay Peng, Myohla, Aihsuah khua hna ah a um mi an si, tiah kan theih. Myanmar ramchung ah COVID-19 zawtnak hmuh thar mi a tam deuh cu, India ram in a rak tlung mi lawngte an si ca ah, India ram in a rak tlung mi hna hi felfai tein tawlrel an herh.
Photo/ Khonumtung Media
