Vawlei cung ramkip nih kan ton cuahmah mi Coronavirus Disease2019 (COVID-19) zawtnak tha lo ruang ah India ram Guwahati le Mizoram chung a um mi Chinmi hna Myanmar ram lei kir ding timhlamhnak an ngei i Chin Ramkulh Cozah nih an rak kir tik ah a rak kir mi hna cohlanpiak ding le ramri in rak donpiak ding in Chin National League for Democracy Party (CNLD) nih nawlnak ca a tial tiah kan theih.
Hi kong he pehtlai in CNLD Party Lutlai Pu No Than Kap nih, “India ram Mizoram, Guwahati le hmun dangdang zong ah Chinmi minung tam ngai kan um. COVID-19 ruang ah harnak an tong ve i, kan ram lei ah rak kir than ding in minung 30 hrawng nih ka sin ah an rak ka chimh. Cun, mi dangdang zong tlun an duh tuk ve tiah kan theih. Mizoram Cozah lei nih cun ramri tiang thlah ding in timhcia tein an um cang. Kanmah Chin Cozah lei zong nih ramri tiang lunglawm tein nan rak cohlannak lai sawm le nawl kan duh ko hna,” tiah The Hakha Post ah a chim.
CNLD nih hi nawlnak ca an chuah mi Chin cozah lei nih zeitindah a leh hna ti mi kong he pehtlai in Pu No Than Kap nih, “Chin Ramkulh Cozah lei zong nih ramri tiang va don ding in Falam Pengkomh ah minung cazin an tawlrel cuahmah. Kanmah lei zong nih cazin zeimawzat cu Cozah sin ah kan kuat cang hna. Anmah le an khuaram tiang phak k h a w h d i n g i n timhlamhnak an ngei ko,” tiah a chimchap.
COVID-19 ruang ah India ram cu 2020 March 21 in luhchuah an phihkhar dih i Lockdown an tuahnak hi thla khat leng a si cang.
