2020 kum Myanmar ram party tling Democracy thimnak ah Independent in Chin Ramkulh, Mindat Peng Amyotha Hluttaw ah aa zuam ding mi Hluttaw candidate pa le Yangon in a rak tlung mi pa hna cu COVID-19 kong he pehtlai in kokek harton case in taza cuai an si tiah thawng kan theih.
Hi kong he pehtlai in Mindat Peng, Biaceih Zung riantuantu pakhat nih, “Atu taza cuai mi hna hi COVID-19 kong he pehtlai in an si. Pakhat hi tutan thimnak ah pumpak (Independent) in Matupi Peng, Amyotha Hluttaw No.6 ah aa zuam ve ding a si. Cun, pakhat hi Yangon in a rak tlung i rian ngeitu hna sin ah thawng a thanh lo ca ah taza cuai a si,” tiah The Hakha Post ah a chim.
Amyotha Hluttaw No.6 ah aa zuam ding hi U Saw Mana a si i, anih hi Ngandamnak Zung nih nawl an chuah mi zul loin a um ca ah 2020 October 22 ahkhan zazatatci case No. 369/20 in case an tuahpiak. Cun, Pu Ling Hung hi Yangon ramthen, Thingangyun in a rak tlung i, thawngthanhnak a tuah lo ca ah 2020 October 23 ah zazatatci case No. 370/20 in case an tuahpiak ve.
An pahnih in a ra lai ding November 5 ah biaceih zung nih an auh hna i, a voi khatnak bia an ceih hna lai tiah thawng kan theih.
Cun, taza cuai a tongmi kong he pehtlai in Pu Saw Mana i a pu Pu Mang Thang nih, “Kokek harton case in taza cuai an si. Pu Saw Mana hi Yangon in a rak tlung. Yangon lei in a rak tlun ahhin amah he a tlungti mi chung ah minung pakhat COVID-19 positive pakhat hmuh a si. Amah he motor aa cit mi hna chung in zawtnak hmuh a si ti a theih le cangka in amah zong Quarantine ah a lut colh ve. Quarantine a luh hnu zawtnak an cheknak zong ah zawtnak hmuh a si lo. Zawtnak hmuh a si lo tik ah meepek sawmnak a tuah. Meepek sawmnak a tuah zong hi Election Commission Zung le Ngandamnak Zung lei nawl peknak in a kal mi a si. Meepek sawmnak a tuah i, ni zeimawzat a rauh hnu ah an tlaih colh hi a si,” tiah The Hakha Post ah a chim.
Pu Saw Mana le Pu Ling Hung hna cu palek sakhan thonginn ah an chiah hna. Pakhat deuh zong hi Chin National League For Democracy chungtel a si ve tiah kan theih.
