India ram, Manipur ramkulh, Imphal thonginn ah thong a tla mi chung in minung 38 cu Myanmar ram ah kan kuat ṭhan hna tiah Manipur ramkulh Chief Minister Biren Singh nih Social media ah a ṭial.
“Myanmar rammi 38 cu Moreh khua Integrated Check Post (ICP) in anmah ram ah tluang tein kan kuat cang hna,” tiah a ṭial.
Manipur in an rak kuat mi hna cu Sagaing ramṭhen chung minung an si i, ngakchia 10, nu 8 le pa 20 an si tiah theih a si.
Inphal thonginn in India-Myanmar ramri Moreh khua ah motor in an ratpi hna i, ramri hlei in Tamu khua Lah-Wah-Kah nih an cohlan hna tiah theih a si.
May 2 zong ah Imphal thonginn ṭhiamṭhiam in nu le ngakchia 39 cu a ṭhip khatnak ah an rak kuat cang hna i, tu tan hi a voi hnihnak an rak kuat mi hna an si tiah kan theih.
India ram, Manipur ramkulh ah rianṭuan ding in a kal mi le ralzaam in aa dor mi hna cu phungning in umnak nawl a ngei mi an si lo ti in Manipur ramkulh Cozah nih a tlaih hna i thong a thlak hna.
Imphal thonginn le hmun dangdang ah Myanmar rammi 200 leng hren lio mi an um rih tiah theih a si.
