NUG ah Minister a ṭuan liomi Dr. Lian Hmung Sakhong le Deputy Minister a ṭuan liomi Dr. Ngai Tam Maung cu an rian in dinhter hna i, anmah aiah Interim Chin National Consulatative Council (ICNCC) in minung pahnih rian luhter ding in ICNCC nih National Unity Consultative Council (NUCC) sin ah halnak a tuah, tiah theih a si.
Atulio NUG ah Minister of Federal Union Affairs rian a tlai liomi Dr. Lian Hmung Sakhong cu ICNCC chungtel a si ti lo caah amah aiah ah Dr. Kenton Linn hi rian luh ding in atulio ICNCC Chairman Pu Lian Luai nih September 19 ah NUCC ah halnak a tuah.
Cun, NUG tang zung pakhat ah Deputy Minister a ṭuan liomi Dr. Ngai Tam Maung zong December 6, 2023 thawk in Chinland Council ah a um cang caah amah aiah Salai Mang B. Thang cu rian pek ding in ICNCC nih NUCC sin ah halnak a tuah ve.
Dr. Lian Hmung Sakhong le Dr. Ngai Tam Maung hi ICNCC aiawh in NUG ah rak thlahmi an si i, atu ah cun ICNCC ah an um ti lo caah atu bantuk in ICNCC nih anmah minung in thlen ding in halnak an tuah hi a si.
ICNCC nih halnak a tuahmi kong he pehtlai in NUG ruahnak petu bu a simi NUCC lei nih zeitin dah lehnak an tuah timi le zeitindah an tawlrel timi fiang in theih a si rih lo.
