Mizoram ah kalpi ding in an thuh mi rithaisii tampi cu 2024 March 29 zaan sml. 10:00 ah Hualngoram Police nih an tlaih tiah Hualngoram Administrative Officer Zung nih a thanh.
Kalay peng, Sekan khua in Rihkhawdar khua, No. 1 sang ah raal a zaam mi Pi Zung Tial (Kum 51) le Sekan khua ṭhiamṭhiam in Rihkhawdar khua, No. 2 sang ah raal a zaam mi Pi Lal Ram (Kum 44) cu bingraang bawm 228 he Hualngoram Police nih an tlaih hna.
Cu an tlaih mi rithaisii hna cu India tangka in Rs. 8,200,000 man a si lai tiah ruahdamh a si i, rithaisii an zuarnak in an hmuh mi Rs. 433,000 le mobile phone 6 he an tlaih hna tiah theih a si.
Hualngoram ralkap le palek nih rithaisii an tlaih mi a hram an zulh dawi i chekhlatnak an tuah tikah aa pehtlai mi minung pathum an tlaihchap hna.
Cu hna cu Tahan in motor in a rak phorhpiaktu Pu Agape Thang (Kum 36), rithaisii a tawng i a zuar tawntu Pu Ngun Khual (Kum 31) le Pu Lalsailo (Kum 25) an si i Rihkhawdar khua ah ralzaam in aa dor mi an si tiah an langhter.
Rithaisii he an tlaih mi hna cu Hualngoram Judiciary Board nih upadi ning in hremnak an pek hna lai ti zong thawngthanhnak ah an langhter.
Photo: Hualngoram Administrative Officer Zung
