Pegu ramṭhen ah hramhram in ralkap an tlakter mi hna Chin mino pakhat cu faak tuk in an hrem ca ah a nunnak a liam, tiah theih a si.
Pegu ramṭhen, Pohkhawng peng, Sanmakyi khuate ah a um mi Asho Chin tlangval pakhat cu 2024 October thla ah khan Malaysia lei kal ding in aa thawh lio ah Karen ramkulh, Myawaddy peng ah SAC ralkap nih an rak tlaih.
Pohkhawng peng chung mi pakhat nih, “An tlaih hnu ah hramhram in ralkap an tlakter. Chinmi a si caah a aw a pei. Awpei in a chawnh mi hna cu a dang ralkap pawl nih zei rel lo in na kan chawnh an ti an tuk an velh. A kut le a ke zong mei in an khangh. An hremnak ah a thih deng hnu ah ting 30 MMK in a chungkhar an tlanhter. Sizung ah an kalpi nain lampi ah a thi,” tiah Kimo Thawngzamhnak ah a chim.
Asho Chin miphun an umnak Pohkhawng peng, Laythar khua zong ah 2024 October thla ah khan SAC ralkap nih Chin mino pahnih an tlaih hna i Mawlamaing i SAC ralkap training camp ah an kuat hna.
Mawlamaing ah an kuat mi hna Chin mino pahnih hi training an lim hnu ah khawzei ah dah an kuat hna ti mi le nungdam in an um le um lo zong chungkhar nih an thei lo, tiah chungkhar he naihniam pakhat nih a chim.
