Hpakant lunghring cawhnak hmun leivawr cimh ruang ah ti nih a huichih mi hna ruak 33 an hmuh cang tiah theih a si.
“Leivawr ponnak a cimh ruang ah a tlau mi minung 42 an si i August 15 ah ruak 25 an hmuh hna, nihin August 16 ah ruak 8 an hmuhchap i an dihlak ah ruak 33 hmuh an si cang,” tiah tualchung bawmchantu phu in tuanvo ngeitu pakhat nih media sin ah a chim.
Ruak 33 an hmuh mi hna chung ah ruak paruk cu hlamtu ngei lo an si i ruak dang tu cu hlamtu an ngei cang. Ruak pawl cu Hpakant thlaanhmun ah khangh ding in an kalpi hna tiah tualchung media hna nih an tial.
Fur caan a phanh fatin Hpakant ah, lung a co mi company pawl nih leivawr an pon mi a cimh tawn caah lung a kawl mi pawl an thi lengmang. 2020 July 2 ah Gwi Hka lunghring hmun leivawr a rak cimh caah lung a kawl mi minung 200 hrawng an rak thi bal cang.
Tu tan leivawr cimhnak hmun i ruak kawlnak, ruak fimnak tibantuk cu tualchung khuanu/pa, mi bawmchantu phu hna nih an tawlrel i SAC ralkap, an kuttaang zung hna le lunghring a rak co mi company pawl pakhat hmanh an rak lang lo tiah lunghring hmun um pakhat nih a chim, ti in Kachin News Group nih a tial.
Photo: CJ
