Hakha Chin Miphun Ni ah Hakha Palek pawl le Hakha mino 45 i bawm in Security tuanvo laakti ding in timhtuahnak an ngei tiah February 16 ah Chin Ramkulh Palek Zung in thawng kan theih.
Hi kong he pehtlai in Chin Ramkulh Palek Lutlai (Yemingyi) U Soe Lun Moe nih, “Hakha Sang 6le khuate 3 chung in mino pa nga cio kan thim hna i Chin Miphun Ni nuam tein hman khawh nakding ah security tuanvo laakti kan timh. Hi mino 45 ca ah Chin hmelchunhnak Vakok a cuang mi angki kan tuahpiak hna lai. Atu bantuk tangka dih in angki kan tuahpiak mi hna hi mizapi nih security lei tuanvo ngei mi an si an theih khawh nakhnga le Chin Miphun Ni buainak um loin nuam tein dih kho seh ti kan duh ruang ah a si,” tiah a chim.
“Mizapi rel khawh ding in security kong he aa pehtlai mi phung pawl zong Vumthumaung certual lutnak hmai ah zapi rel khawh ding in kan taar lai,” tiah a chimchap. (By: Joseph Lal Bawi)
