Chin Ramkulh Cozah hruainak in Pyidaungsu nih Hakha-Hmandaw lam pemh nakding budget nuai 3000 a pek cang, 2020 chung ah lam pem ding in timhtuah a si, tiah kan theih.
“Hi lam hi kan helhhumnak a sau ngai cang. Myanmar ram Vice President-2 Pu Henry Van Thio zong nih hi lam hi papek in tuan hmasa ding a kan forh mi a si. Budget zong a tla cang i riantuan hramthawk ding lawng khi a taang. Kanmah kan caan chung ah lam pemh khawh kan i zuam lai. Lung belte kan phah manh lai lo. Lam a sau hi meng 65 hrawng a sau,” tiah Chin Ramkulh Cozah Lamsuul Minister Pu Sui Thio nih The Hakha Post ah a chim.
Hakha-Hmandaw lam lawng si loin Rinpi le Haiphai kar Dong hlei zong NLD Cozah nih an caan chung ah dawnh an timh, tiah kan theih.###
