Rakhine ramkulh, Mrauk-U peng khuate ah nufa hna cu HIV zawtnak an ngei an ti hna caah khuami nih khualeng ah an chuah hna, tiah theih a si.
Khuami nih nufa hna khualeng ah an chuah hna i inn fate ah anmah pahnih telawng khua an saknak hi zarh khat hrawng a si cang, tiah Western News nih a langhter.
Khualeng ah chuah a tong mi nu nih, “Ka vapa hi HIV a ngei. Cu HIV a ngeih zong cu a thih hnu ceo ah kan theih ve. Kan pa a thih hnu in khuami hna nih a kan chonh dih ve lai ti mi an phan caah khualeng ah a kan ṭhawl. Khualeng ah kanmah nufa lawng kan um caah zaan caan ah cun thinphang in kan um peng. Zaan kan i hngilh kho lo,” tiah a chim.
Khualeng ah chuah a tong mi nu hi kum 33 nutung a si i, kum 8 a si mi fapate pakhat a ngei.
Aluancia zarh hnih hrawng ah khan HIV a ngei mi a vapa a thi i, zarh khat hnu ah khuami nih an nufa in khualeng ah an ṭhawl hna hi a si.
HIV zawtnak a ngei mi an si an ti hna caah a fapate zong hi khuachung ah luhnak nawl an pek lo caah sianginn zong a kai kho lo, tiah Western News nih a ṭial.
