UFC ṭhuat zuamnak ah Joshua Van nih sunghnak a ton hnu ah atu nak ṭhawng deuh in ka rak kir ṭhan lai, tiah a Facebook cahmai ah a ṭial.
July 13 zinglei ah US ram, Denver khua ah an tuah mi UFC Fight Night ah Joshua Van cu amah nakin a kum upa deuh mi le a khaan a sang deuh mi Charles Johnson he an i ṭhua i, Round 3nak ah Johnson nih Joshua Van cu tluk lak in a thongh khawh.
Joshua Van cu Round 2nak a ṭha bik in aa ṭhua kho ko nain Round 3nak an thawk ka te ah Johnson nih a khabe ah tluk lak in a thongh i Joshua Van cu a sung.
Joshua Van nih ruah lo piin a sungh mi kong he pehtlia in, “Ka ngaithiam hram u,” tiah a Facebook cahmai in mizapi sin ah nawlnak a tuah i, “Hi nak ṭhawng deuh in ka rak kir ṭhan lai,” tiah a chim chap.
Joshua Van hi June 2023 thawk khan UFC ah a rak i ṭhua i atu tiang ah UFC ṭhuat zuamnak ah voi 4 aa ṭhua cang. Voi 4 aa ṭhuat chung ah voi 3 teinak a hmu i atutan i a voi khatnak a sungh a si.
