Hakha hrambunh Health Concern Volunteer Gorup (HCVG) cu a voi 35nak Mobile Clinic an kal i June 24, Camp Victoria ah CNA ralkap le an chungkhar pawl ngandam zohkhenhnak an va tuahpiak hna.
Tutan mobile clinic ah doctor pathum, sister pathum, nurse pakhat tel in riantuantu minung 10 an kal kho. Ngandamnak an chekpiak hna, sii an pek hna pin ah Fuur chung ca za ding in sii-ai an chiah taak hna. Thi chekpiaknak zong an tuah, tiah tuanvo ngeitu sin in kan theih.
“Mobile clinic kan kal hi a voi 35nak a si cang. Tutan kan kalnak hi Emmanuel Chin Baptist Church, Dallas Nubu nih thawhlawm an kan kholhpiak mi a si. Thaal caan ah, thla khat voi khat kal kan i zuam i Fuur caan ahcun a nikhua zoh in kan kal tawn.” tiah HCVG Chairman Pu Chan Hrem nih The Hakha Post ah a chim.
HCVG cu Hakha khua ah hrambunh in 2008 ah dirh mi pumpek in ngandamnaklei riantuantu phu a si.###
