Ramkulh Hluttaw nih Sipin ngunkhuai le Zu licence man an kaiter, inn hmun ngunkhuai an thumh
Chin Ramkulh Hluttaw nih a voi 21nak Caanhmaan Meeting ah Sipin ngunkhuai le Zu licence man an karhter i inn hmun ngunkhuai an thumh, tiah kan theih.
Video zoh na duh cun a tang hin zoh.
“Sipin ngunkhuai hi inntung rel tein tlawmpal a karh. Zu licence hi tahchunhnak ah ramdang zu cu kum dang ah tangka sing 15 a si mi kha atu sing 20 ah a karh. Beer hi kum dang ah sing 25 kha atu sing 30 ah a karh. Zu kong tu hi cu phun 9 tiang a um. Cun, inn hmun ngunkhuai hi Pu Hung Ngai chan ah khan pee 60’x60’ hmun pawl hi Hakha ahcun tangka Ks. 300,000 man kha atu Ks. 150,000 ah thumh a si. Cuticun mah Pengtlang cio hoih in thumh a si. Tahchunhnak ah Thantlang hi Ks. 150,000 a si tawn mi kha Ks. 100,000 ah, tibantuk in inn hmun man cu a tum. Hi inn hmun man thumh mi hi a herh ngaingai mi le a tha tuk mi a si,” tiah MP Pu Van Thawng nih The Hakha Post ah a chim.
Hi biatung; Sipin ngunkhuai karh, Zu licence man kaiter le inn hmun ngunkhuai thumh hi Chin Ramkulh Cozah lei nih biatung an dirh mi a si i a voi 21nak Ramkulh Hluttaw ah an fehter. Cun, February 4 ah Revived Estimate (RE) ti mi zohfelnak, 2019-2020 tangka kum riantuan mi tangka chap herh mi le remh herh mi pawl zohfelnak an tuah rih lai, tiah kan theih.
