Hakha Zophei Sianghleiruun Siangakchia Bu (HZSSB) nih July 10 in 12 tiang CACC Hall ah crusade le seminar an tuah, tiah kan theih.
Zaan ah crusade an tuah i cawnpiaktu ah CCU in Dr. Siang Zi an sawm. Zarhteni chun ah seminar an tuah i cawnpiaktu ah CHRO in Project Manager Salai Van Biak Thang, The Chinland Post in Salai Mang Hre Lian le Salai Bawi Uk Thang zong an sawm hna. A kai mi hi siangakchia lawngte minung 160 hrawng an si kho. Hi an crusade le seminar ah tlang dangdang zong an sawm hna, tiah kan theih.
“Hi kan riantuannak hi siangakchia kan karhlannak ah a thahnem lai ti ruahchannak he kan tuah mi a si. Siangakchia kan si bantuk in kanmah nih kan tuah khawh lo ca ah khuapi in siseh, khuate in siseh, nulepa nih chawva in siseh, ruahnak in siseh, a lamkip in an kan dirpinak thawng in kan tuah khawh mi a si. Hihi kum khat voi khat tuah khawh ding zong saduhthahnak kan ngei,” tiah HZSSB President Salai Bawi Uk Lian nih The Hakha Post ah a chim.
Hi an crusade le seminar ah chawva in bawmchantu hna cu; Pu Ngun Awi (Sanpiah Boarding), Pu Ral Dun (Hermon Boarding), Pu Robin (Myattamon Boarding), Pi Ngun Doi Tial (Chin Galaxy Private School), Pu Biak Mang (New Light Boarding) hna an si.
