Hakha khuapi rawk loin ral tei ding in timhtuah a si caah khuami hna nih khua zaamtak lo ding in CDF-Hakha nih mizapi sin ah theihternak a tuah.
CDF-Hakha President Pu Hram Lian nih nizaan September 7 ah “Mizapi Sin Biacah” timi tlangtar in theihternak a tuah i, a cunglei bantuk in khua zaamtak lo ding in forhfialnak a tuah hi a si.
“Hakha cu Chinram khualipi caah Pathian nih siangbawi hna hmang in a thimmi le siangbawi luruh he a hngahmi khua a si. Mipi zong zam hau lo, khuapi zong rawk lo tein ral kan tei lai. Hakha khuapi rawk hlah seh ti na duh ahcun hrial ta u tiah thanh a si hlan cu zamtak hlah. Zamtakmi khua cu khuachia le ralhrang lawng nih an hngah. Hakha a zamtakmi cu Hakha a rawh zong ah a poi lo a timi an si,” tiah Pu Hram Lian nih a Facebook cahmai in theihternak a tuah.
Hakha khuapi laaknak Rung Operation cu dot thum in kalpi a si i, atu ah a dot khatnak a simi ralkap thazaang chah tiang lawng kalpi a si rih. A dot hnihnak a simi thazaang tumtlang in nam a si tik ah cun mizapi sin ah theihternak tuah a si te lai, tiah a langhter chap.
Mizapi lei nih zulh dingmi: ralhrang cozah SAC he pehtlaihnak ngeih lo ding, mizapi caah harnak a chuahpitu rithaisii phorh le zuar lo ding, kokek thil sawksam lo ding, uico zuat rih lo ding le Hakha University lam zulh rih lo ding in CDF-Hakha nih theihternak a tuah chap.
Kahdohnak a chuah tik ah mizapi nih himnak an hmuh nakhnga khor/bunker tuah cio ding, zaan ih tikah a himnak ah ih lengmang ding, lakhruak in a herh dingmi eidin le sii tibantuk pawl i timhtuah cia ding le puak thawng theih tikah mah himnak ruah hmasa ding zong in theihternak an tuah chap.
