Ralkap uk kan duh lo timi langhternak ca ah tiin Hakha University sianginn i siang cachim saya/ma minung 262 chung ah minung 250 hna cu Civil Disobedience Movement cawlcanghnak ah an i tel tiah theih a si.
Hi kong he pehtlai in Hakha University sianginn i sianginn cachim min langhter duh lo pakhat nih, “Atu bantuk in CDM cawlcanghnak ah kaa telnak a ruang bik hi Upadi um lomi ukhruainak tang ah riantuan ka duh lo. A timh zong kaa timh mi a si lo. CDM cawlcanghnak ah kan i tel tik ah thlahlawh pek lo ding tiang in kan sianginn cunglei lutlai hna nih an kan ti ko nain, kai lo ding in biakhiahnak ka tuah. Upadi um lomi ukhruainak tang ah riantuan ka duh hrimhrim lo,” tiah The Hakha Post ah a chim.
CDM cawlcanghnak hi kanmah Chin Ramkulh chung lawng si loin, Myanmar ramhuap Cozah riantuan a tam deuh nih an tuah dih cio. Chin Ramkulh chung hmanh ahhin a tam deuh cu CDM cawlcanghnak ah an i tel.
Cun, CDM cawlcanghnak nih hin thathnemnak a chuahpi kho lai maw ti mi kong ah min langhter duh lomi pakhat nih, “Mizapi nih kan hmuh cio bang in Myanmar ram uknak cu ralkap nih 2021 February 1 zinglei sang ahkhan an laak. Hi ralkap uknak hi lamzawh sawh, au sawh inhin cun kan tei khawh lai ti cu ka zum theng lo. Kan tei khawh nakding a lam a um bik mi cu CDM cawlcanghnak hi a si. Uknak tha lo a do mi hna lak ah teinak an hmuh cemnak cu CDM cawlcanghnak in a si. CDM cawlcanghnak in dothlennak a tuah i teinak a hmu mi hi vawlei cung ah ram 19 an si kha hmuh khawh a si. Cu a si ca ah CDM cawlcanghnak hi atu lio kan dirhmun ahcun a biapi cemmi a si ko. Cozah riantuan hna zong nih CDM hi biatak tein kan dirpi le kan tanpi awk a si. Kan ram a that nakding ca ah Cozah riantuan hna nih luphum in kan tuanpiak hram ko uh,” tiah The Hakha Post ah a chim.
Chin Ramkulh chung in nihin tiang CDM cawlcanghnak ah aa tel rih lomi a tam deuh hi cu Meithat zung in an si. Hi Meithat zung hna lak ah Matupi le Mindat i meithat zung riantuan hna cu CDM ah an i tel cang tiah kan theih.
