Hakha University sianginn area chung, Pathian thangthat nakding Chapel an sak lio mi ca ah siangngakchia hna nih Hakha ah bawmhnak an hal i tangka fang sing 100 leeng an ngah tiah Salai Van Za Tei sin in thawng kan theih.
Bawmhnak an halmi kong he pehtlai in Hakha University Students Union President Salai Van Za Tei nih, “2020 September 6 in 15 tiang kha Hakha ah innlak ah vaak in bawmhnak kan hal. Hakha ah bawmhnak kan halnak ahhin tangka in sing 100 leeng cu a chuak. Hi chapel saknak ca ah Hakha lawng ah bawmhnak hal si loin Falam le Thantlang zong ah bawmhnak hal kan i tim. Falam zong hi hmaizarh cun bawmhnak kan hal ve cang hna lai. Cun, Thantlang lei hi anmah lei tlamtlinlonak tete a um ca ah November thla chung lawng ah kan thok khawh te lai,” tiah The Hakha Post ah a chim.
Hakha University sianginn area chung chapel ca ah a dih ding mi hi sing 1600 leeng hrawng a si lai. Nihin tiang ah a cungcih cu aa lim cang, tiah Hakha University Lutlai Dr. Lian Za Khup sin in thawng kan theih.
“Atuhi sak cuahmah a si. A cung cih hi cu aa lim cang. Hi chapel kan sak zong hi Cozah lei bawmhnak le tangka pek mi pakhat hmanh a um lo. General Min Aung Hlaing Hakha a rak tlun lio ahkhan Khuanu Khuapa hna halpiaknak thawng in a cungcih camphio 250 le mirang vawlei (Cement) tun 1000 bawmhnak an kan pek. Cun, Hakha khuachung khrihfabu kip zong ah bawmhnak hal a si. COVID-19 zawtnak nih atu hi a kan phak i tualchung bawmhnak hal zong hi kan i din rih,” tiah Dr. Lian Za Khup nih The Hakha Post ah a chim.
“Hakha University ahhin siangngakchia dihlak minung 1000 fai an si, zatuak zatuak 90% hi cu kanmah Khrihfa biaknak a biami lawngte an si ca ah hi chapel hi a si khawh chungin kan tawlrelnak a si,” tiah Dr. Lian Za Khup nih a chimchap.
Hi an sakmi chapel hi a ra lai ding December thla chung a si lo ah, 2021 February thla chung ah liim kho ding in timhlamhnak an ngei. Hakha University hi an rak sak ka ahcun Hakha College ti a si nain, 2020 August 31 ah Ramkomh Cozah nih Hakha University tiah a thlen mi a si.
