SAC nih hon a timhmi Hakha University ah kai ding in a soktu an um rih lo, tiah thawng kan theih.
SAC nih Myanmar ramchung University 23 hon ding in timhtuahnak a ngei i cu chung ah cun Hakha University zong aa tel ve.
University kai nakding Application Form cu August 26 in September 12 tiang laak khawh a si lai, tiah SAC nih August 18 ah thawngthanhnak a tuah a tuah nain atu tiang ah cun a soktu an um rih lo tiah theih a si.
Hakha Unveristy he naihniam a simi minung pakhat nih, “University kai ding in soknak Form cu peng fimcawnnak zung ah laak a si lai i, Univeristy ah ap a si lai. A lang in le a ni in a kaimi hna nih sok khawh a si. Atu tiang ah cun a soktu an um rih lo,” tiah August 29 ah a chim.
SAC nih Hakha University hon an timhmi kong he pehtlai in khuami cheukhat nih cun Hakha khua kiangkap ah kahdohnak a um tawn caah a tlamtling kho lai lo tiah ruahnak an ngei.
CDF-Hakha zong nih August 20 thawk in Thantlang lam i Hakha University lampial in Hakha University karlak ahohmanh kal lo ding le a kalmi cu ralhrang ralkap an si tiah ruah an si lai, tiah August 19 ah thawngthanhnak a rak tuah.
