Hakha um Thau khuami i Zohkhenhnak le Hawikomhnak bu nih January 19 ah General meeting an tuah i ruak vui hnu thlaan a veh mi nih rawl dumtinak tuah si ti hlah seh, tiah biachahnak an ngei, tiah theih a si.
“Laimi kan pipu hna nih ‘Minung cu Arkhong mei bang kan i rual lo’ tiah an ti. Thihnak ton tik ah midang tuah cio mi cu uitlak cho cuh in tuah cio a si. Lung a fah tuk lio ahcun leiba ngeih zong tih a si lo. Cucaah mi tuah cio mi a si ti loin ‘Hakha um Thau khuami nih cun ruak vui hnu thlaan a veh mi nih rawl dumtinak tuah si hlah seh’, tiah biachahnak kan ngei,” tiah an Chairman Pu Rual Thang nih The Hakha Post ah a chim.
“Ruak vui hnu thlaan veh lawng si lo in thih camtuak zong tuah si hlah seh. Hi biachahnak kan tuah hnu ah ngai lo in a tuah mi cu khuami nih rawl dumpi si hlah seh, tiah biachahnak zong kan tuahchih,” tiah an Chairman nih a chimchap.
“Thlaan vehnak kong he pehtlai in ka nu a rak thih tan ah kanmah chungkhar nih cun thlaan tlaak thaizing thlaan kal le rawl dumtinak tuah kan i tim lo nain kiangkap komhawi hna nih ‘Thlaan kal si lai maw, tiah an kan hal lengmang ca ah an hmai khah lo kal in kan kal. Thlaan kal le kal lo kong ah midang i thlak lo ah a tha, tiah ka ruah,” tiin upa pakhat nih The Hakha Post ah a chim.
“Ruak vui hnu thlaan veh i rawl dumtinak tuah hi mi ngei deuh nih an thawk mi a si in ka ruah. Laimi kan phung a si in ka thei lo. Ruak hngah hmanh i khap nalak ah hi thil tuah hi cu tuah lo ding hrim a si ko tiah ka ruah,” ti in upa pakhat nih a chim.
Hakha khua ah Thau khuami i Zohkhenhnak le Hawikomhnak bu chungtel chungkhar zakhat hrawng an um i, kum khat ah voi khat General meeting an tuah tawn, tiah theih a si.
