Myanmar ram uknak ralkap nih February 1 i a laak hnu ralkap sermi Cozah kan duh lo ti langhternak ca ah tiin zung kai lo Civil Disobedience Movement cawlcangnak ah aa tel mi Hakha ah minung 2500 leeng an si cang tiah theih a si.
Hakha i Cozah zung a ummi chung ah zung in 57 an si i, hi zung 57 chung in 2021 March 2 tiang CDM a tuah mi dihlak minung 2535 an si cang tiah CDM Supporting Team for Hakha nih a thanh.
Hi kong he pehtlai in CDM Supporting Team For Hakha i tawlreltu pakhat nih, “March 1 lawng ahkhan CDM aa chapmi minung 361 an si. Hakha Cozah zung riantuan minung 3000 fai an um i, hi chung ah a tam deuh cu CDM an tuah dih cang. Cozah riantuan an dihlak CDM cawlcanghnak ah an i tel dih ko lai ti hi kan zumh mi zong a si,” tiah The Hakha Post ah a chim.
Hakha khuachung um Cozah riantuan CDM a tuah mi hna chung ah a tamcem zung hi Fimcawnnak zung in an si. Fimcawnnak zung in CDM a tuah mi dihlak minung 750 an si tiah cazin an langhter mi chung ah hmuh a si.
