Chin Ramkulh, Cozah nih kum hnih leeng hngah cang mi Hakha dinti tuahnak kong ah tangka khirh than ding tangka 2,000 million cu company lei nih nihin tiang khirh than a um rih lo tiah Chin Ramkulh, Sipin Minister Pu Soe Htet sin in thawng kan theih.
Hakha khuapi chung dinti simanking hi Ramkulh Penguk Zung i 2016-17 tangka kum ah zanpung-ngui 2900 million in 2016 kum lio ah K&DL company le Moekuk Shwe Yi company hna nih tuanhram an rak thok.
Hi simanking hi 2017 kum March thla dih hlan ah liim ding in biakamnak an rak tuah nain voi thum tiang a nicaan sauhpiak ding in an rak hal than i 2017 kum December thla dih hlan ah liim lo a si ahcun, tangka khirh than ding in biakamnak zong an rak tuah tiah theih a si.
K&DL le Moekukk Shweyi Company nih an biakam ning in an rak liim lo ca ah 73,854,751.80 le cazin chek hnu ah hmuh mi tangka hlei 2227.763 million khirh than ding in Ramkulh Cozah nih 2019 June 21 ah a voi hnihnak thawng an thanh than hna.
Minister Pu Soe Htet nih, “Company lei nih tangka khirh than ding an kan khirh rih lo.Kanmah lei zong nih kan hngah lio a si ve ko. Khirh than ding in anmah he zong bia kan rak i ruah cia mi a si. Tu thla chung ah tangka khirh than ding mi an kan khirh lo a si ahcun, taza cuai ding lawng a taang cang,” tiah The Hakha Post ah a chim.
Company lei nih tangka khirh than ding in 2019 July 12 ah biakamnak an rak tuah nain, nihin tiang Cozah lei nih zeihmanh lehrulnak an tuah rih lo tiah theih a si.
Cun, “Raintuan i tangka dih ding zat leeng in an chuah mi a um. Hi bantuk in thil a um ca ah sing 2000 leeng hi an duh zong duh lo zong ah Cozah sin ah an khirh than lai,” tiah Minister Pu Soe Htet nih a chimchap.
Hakha khuachung dinti peknak ah Ramkulh Sipin nih tuanvo a laak. Hakha khuachung thal caan ah ti a tlawm ca ah kum fatin ti a har tawn tiah theih a si.
