Hakha Timit dinti laak mi khuachung pipe line zamhnak a tuahtu company riantuan ning a that lo ca ah nihin tiang dinti har a si i cu kong ah Chin Ramkulh Cozah nih dantat ding biachahnak a ngeih cang nain zeitin dah dantat an si lai, ti mi nihin tiang biachah khawh a si rih lo.
“A liamcia ni zeimawzat ah khan an riantuan mi kong zohfelnak le chekhlatnak tuah dih a si cang i Chin Ramkulh Cozah phu sin ah report a phan cang. Chin Ramkulh Cozah Phu (Cabinet) nih ceihmainak a ngeih i dinti a tlamtlin lonak a ruang pariat hmuh a si. Hmai zarh chung hrawng ah riantuantu company he kan i tong lai i anmah lei tuah ding, kanmah lei tuah ding kong cung ah hngat in biachahnak a um te lai,” tiah Chin Ramkulh Sipin Minister le Chin Ramkulh Cozah Chimphuannak Nawlngeitu Minister U Soe Htet nih The Hakha Post ah a chim.
Hakha khuachung Timit dinti pipe line zamh mi cu design aa palh ca ah thilri a hlei tampi a um, pipe line peh ningcang a dik lo hlei ah, pipe line peh tik ah a herh mi thilri tlamtling in an tuah lo, tiah kan theih.
“Hakha khuacung Timit dinti zamhnak pipe line tuah tik ah cucu, khakha tuah ding ti mi biakamnak cahren minthut ning in an tuah lo i an zul lo. Pipe lawng peh sawh in an peh i a ti kal nakding ah a dang a herh mi zeihmanh an tuah ti lo,” tiah Minister U Soe Htet nih a chimchap.
Hi bantuk in Chin Ramkulh Cozah nih Hakha khuachung Timit dinti pipe line zamhnak tuahtu dantat ding timh mi kong ah Hakha Dawrthar khuabawi Pu Van Khia nih, “Fiang tein chim ko ning. An tuah mi a that lo ahcun a that lo ning in dantat phung cu a si ko i ngaihthiam cu a um theng lo. Cucaah, an tuah mi a that lo ahcun a that lo ning in an in ding a si,” tiah The Hakha Post ah a chim.
Nihin tiang Hakha Timit dinti tilaak mi a tlamtlin lo ca ah khuami dinti har in an um i dinti cawk in khua an sa. Hakha ah dinti hi tangka Kyats 10,000, Kyats 15,000 tibantuk in dinti an zuar i voi khat cawk mi dinti hi zarh khat hrawng hmang a si (thil suk loin). Dinti a har deuhnak sang cu dinti cawknak ah thla khat tangka 50,000 hrawng dih a si, tiah kan theih.###
