Chin Ramkulh chung ah a pakhatnak a si mi kal tawlnak seh cu Hakha sii-inn ah an bunh i June 17 ah honnak an tuah.
Honnak tuahnak hmun ah Chin Ramkulh Hluttaw Speaker Pu Zo Bawi, Planning and Finance Minister Pu Vui Kaw, Ramkulh Cozah Thawngthanhnak Zung, Pengkomh Uknak Zung, Hakha Peng Uknak Zung, Peng Sipin Zung in lutlai pawl le Khuanu Khuapa nih an telpi hna.
Immanuel Baptist Church, Church Pastor Rev. Dr. Lal Pek Lian nih Pathian sin pekchanhnak thla a cam i honnak tuah a si.
“Kal tawlnak seh cu 2016 kum lio ah a kan pek cang mi a si nain ti, mei le a dang thilri tete tlam a tlin deuh lo ruang ah kum thum chung dengmang kan thawk kho lo. Ti zong hi Sipin nih laakhruak bak in a kan tuahpiak ca ah nihin ah cun kan thawk khawh cang. Chin Ramkulh Cozah cung zong ah lunglawmhnak tampi kan ngei,” tiah Hakha Sii-inn-uk Dr. Mang Biak Kung nih The Hakha Post ah a chim.
Hi kal tawlnak thawk hlan thla nga hrawng a hlankan in specialist siibawi pakhat, A.S. siibawi pakhat le nurse pali training kaiter an rak si i kal tawlnak he pehtlai in thiamnak, sii-ai le thilri tlam a tling ko. Kal tawl man cu khiah a si rih lo nain hmun dang nakin tawl man a tlawm deuh nakding, mizaw nih fawi deuh in an i tawl khawh nakding timhtuahnak kan ngei ti zong Dr. Mang Biak Kung nih a chim.
“Mizaw pakhat kal tawl tik ah timhtuah caan he suimilaam panga hrawng a rau. Hakha sii-inn nih seh pahnih kan ngei i Zinglei 7:00 hlan in thawk ahcun chun suimilaam 12 hlan ah minung pahnih a tawl khawh hna lai, zaanlei ah pahnih a tawl khawh hna lai. Ni khat ah mizaw pali kal tawl khawh a si lai,” tiah kal tawlnak tuanvo ngeitu Dr. Thang Soe Lian nih The Hakha Post ah a chim.
Honnak tuah lio ah Hakha khua, Pyidawtha sang khuasa Pu Ngun Thawng, kum 56 a kal an tawl. Pu Ngun Thang cu Yangon khua ah voi 83 a kal aa tawl cang mi a si i Hakha khua ah kal tawlnak seh a um cang ca ah a rak tlung mi a si.
“Kawl lei ah kal in harsa tuk in kan va i tawl tawn. Mah khua le ram ah a um cang tik ah tangka zong a dih deuh ti lai lo. Chungkhar le u le nau he hnangam tein um khawh zong a si cang,” tiah Pu Ngun Thang nih a chim.##
