Hakha sii-inn phanh hlan lamthlang Lunghleiva nih May 24 zing ruah sur mi luti nih Pu Phir Cung Nung le tlangval Ngun Tha Thang a fenh hna, an lu an i khawng i a nunnak cu thinphan awk a si lo.
“Tuzing ruah a hong sur i luti a van chuah khan mahka tiva hor i tikor kuak an zuuknak a hrawh sual lai ti in an va zohnak ah a rak fenh hna. A thlanglei furlong pakhat leng tiang a fenh hna i an lu hi a biapi in an i khawn i an nunnak ca ah cun tih a nung lai lo,” tiah a va chanhtu hna anmah khuami Pu Tawk Mang nih The Hakha Post ah a chim.
“A fenh hnanak tiva hi kan inn thlang te a si i ka fale nih an tah thawng le an au thawng an theih hna i kan fa va dawi hna. Furlong pakhat tluk hrawng a fenh hna hnu ah Pu Phir Cung Nung hi cu amah tein a rak chuak i a nau deuh hi cu kan va chanh. A fenhtu hna tiva hor hi a chuk tuk pin ah a karlak ah lungpang bantuk a um pah ca ah cuka i a thlak hnanak ah an hma a fah deuhnak a si,” tiah a cunglei upa nih a chimchap.
Hi a fenh mi hna hi Thantlang peng Vomkua Hakha Ketheibo sang um mi an si. Mah ka tiva hor hi tikor kuak an zuuk tawnnak a si i micheu cu chungkhar tangka hmuhnak ca zong ah an hmang mi an um. Cun hi tiva hor ah hin a liam cia mi kum thum hrawng ah nu pakhat zong a rak fenh i a nunnak a rak liam.Hakha khua kam luti hor pawl hi, cu hlan nakin tih an nung deuh cang, zeicatiah khuachung luti hor pawl khuami nih hmunthur hlonhnak ah an hman i thaal chung vialte an hlonh mi nih ti kha a kham hnu ah a lanhpi mi an si ca ah a thlanglei sang um mi ca ah cun tih a nung ngaingai tiah sang upa sin in kan theih.
Photo: The Hakha Post
Theihternak le ralrinpeknak: The Hakha Post hnatlaknak tel lo in kan thlah mi thawngpang le hmanthlak hmanpiak kan siang lo. Ningcang lo in a hmangtu le a firtu online thawngzamh pawl cu screenshot he phozar nan si lai.
