Hakha, Khuathar sang Pu Ral Hmung certual ah sak an rak timh mi Hakha Shopping Mall cu mi cheukhat lung tlin lo ruang ah Hakha Pengkomh, Penguk Zung hmun ah pee 200 x 200 dot nga in timhlamhnak an ngei i, atu hi tender kan auh lio a si tiah Chin Ramkulh Hluttaw Speaker Pu Zo Bawi sin in thawng kan theih.
“Shopping Mall sak nakding hi a hramthok ahcun Hakha khuathar sang i a ummi Pu Ral Hmung certual chung ahkhin sak ding in timhlamhnak le suaisamnak kan rak ngei. Pu Ral Hmung certual ah sak ding zong hi kanmah duh si loin khuathar sang chung a ummi hna nih an kan hal ca ah a si. Asinain, mino le cheukhat khuami hna nih an duh lo. Lungtlinnak a um lo ca ah Developer lei zong nih tuanhram thok ding an sia rem ve lo. Lungtlinnak a um lo ca ah a hmun hi i thial ko sehlaw kan ti i, atu Hakha Pengkomh, Penguk Zung hmun ahkhin kan thial hi a si. A rauh hlan ah tuanhram kan thok colh lai. Atu hi Tender kan auh cuahmah,” tiah Pu Zo Bawi nih The Hakha Post ah a chim.
Atu shopping mall an sak nakding hmun hi acre 0.956 a kauhnak hmun ah a si. Cun, atu an sak nakding hmun hi Hakha Pengkomh, Penguk zung hmun ah sak ding a si ca ah, zungthar dot thum in sakpiak ding in timhlamhnak a um tiah theih a si.
Shopping Mall sak ding hi Chin Ramkulh Cozah budget in sak ding si loin Developer pakhat khat nih tuanvo lak in sak ding a si. A hlan i an rak timh mi Pu Ral Hmung certual chung sak dingmi kong ah 2020 December 27 ahkhan Hakha khuachung mino le khuami cheukhat hna nih an duhlonak cathanh zong an rak chuah bal.
Cun, Pu Zo Bawi nih, “A hmun kan thial hnu zong ahhin khuathar sang chung in cheukhat minung nih tuahpiak than ding in a rak kan halmi zong an um. Asinain, a hmun thialkam dih a si cang ca ah ti awk a tha ti lo i ka khirh ko hna. Khuathar ah sak ding kha rak duh in rak cohlang hna sehlaw atu ahhin sak hram aa thok cang lai. A satu ding zong a rak fiang cang ko nain, duhlonak tete a um pah lengmang ca ah a satu ding nih Falam Town Hall pi khi an sak mi a si” tiah a chimchap.
A hlan an rak i timh ning ah hi shopping mall hi Kyats 20 billion dih ding in an rak suaisam cia dih cang mi a si tiah kan theih.
Photo/ Atu shopping mall an sak nakding hmun a si.
