Hakha Khuathar BEHS No. 2 Sianginn kam, Ral Hmung certual ah Chin Ramkulh Cozah nih Shopping Mall sak ding timh mi kong he pehtlai in Chin Ramkulh Cozah le mizapi tonnak cu 2020 January 29 ah an tuah i, Hakha Khuathar mino nih an duhlonak an chim.
Chin Youth Organization Hakha (CYO) President Salai Van Cin Thang nih, “Hi hmun hi 1982-1983 kum hrawng ah kan pi kan pu nih an rak thawk. Cun, 1987 ah khuami nih Cozah le Sang dang bawmhnak tel loin an rak cawh mi a si, tiah kan pale sin in kan theih. Kan pi kan pu ro a si. Hakha cu khuapi pakhat a si ve ca ah khua he aa tlak ning in thangcho seh ti cu kan duh tuk cio.
Shopping Mall sak ding zong hi kan duh tuk, kan cohlan ko. Asinain, hmunhma a umcia mi ah sak cu kan duh bak lo. Hakha nih hmunhma tampi kan ngeih ko tung, hmun dang tu ah kan ruah piak ko u. Sianginn he aa naih tuk ding mi cu kan duh lo. Cun, hi hmun hi Hakha mino tampi nih zalong tein lente kan i celhnak hmun zong a si,” tiah tonbiaruahnak ah a chim.
Hi kong he pehtlai in Salai Van Lal Cross Thang nih, “Shopping Mall sak hi kan duh tuk ko. Asinain hi nih a chuahpi ding mi hna cu, pakhatnak ah Hakha khuachung i mah pum pawcawmnak dawr a tuah mi hna ca ah sungh zatlaknak an ton lai, zaangleklei buainak a chuak kho. Pahnihnak ah pakhat le pakhat i pehtlaihnak, dawtnaklei ah aa kan dawntu a si kho.
Pathumnak ah Sianginn he aa naih tuk ca ah siangakchia fimthiamnaklei a dawnhkhanh lai, kan cozah nih fimthiamnaklei thancho ding in aa zuam liopi a si fawn. Palinak ah Laimi cu Khrihfa kan si ca ah, hi hmun pawng ah hin biakinn panga hrawng a um tik ah, hmailei ah hnacheh le buaibainak a chuak kho. Shopping Mall hika an sak ahcun siangakchia himbawmnak zong ruah a herh, minung, motor le motorcycle a tam lai ca ah khawndennak a tam lai. Kan pi kan pu nehnang a rawh lawng si loin hi nih a chuahpi ding mi harsatnak tampi zong a um fawn.
Cucaah, Shopping Mall hi kan duh ko. Asinain hmun dang tu ah cozah lei kan pale nih kan ruahpiak hram u,” tiah a chim. Hi tonbiaruahnak ah cozah lei lutlai ministers cheukhat zong an i tel. Cun Khuathar Khuanu Khuapa zong nih an lungduh chimphuannak an ngei.
