Hakha sangthar samhnak kong he pehtlai in a soktu hna dirhmun le sining cu tuanvo ngeitu hna nih an si khawh tawk in hlathlainak an tuah hnu ah mee zuh ding mi hna le mee zuh a ngah lo mi hna cu a tang lei bantuk in an fianter.
Mee zuh a ngah lo mi hna hi phun 2 in then an si. Then khatnak cu Hakha ah khua an saknak kum le caan zoh chih in kum 2 tling lo mi le Innhmun ngei ko bu in a sok mi hna chungkhar ti in then an si. Innhmun soktu hna dih lak hi 1079 an si, hnon mi chungkhar 382, thim mi hna chungkhar 696 an si.
Tutan inn hmun soknak kong ah innhmun samh ding mi hi hmun zeizat a si lai a fiang rih lo. “A tu tiang ah cun inn hmun tahtu hna nih hmun 275 lawng hi an tah rih mi a si. Hi 275 hmun hi fehter mi a si rih lo, hnon than ding mi hmun a um kho mi a si ca ah hmun zeizat dah samh a si lai ti mi cu a fiang rih lo” tiah Pu Ngun Vung nih The Hakha Post ah a chim.
Hi hmun 200 hrawng ah chungkhar 696 nih mee zuh ding cu chungkhar 400 reng lo hna cu an ting lo ti cu a fiang, asinain samh nolh tik ah “A hlei n ruah piak an si lai” tiah Pu Ngun Vung nih a chim chap.
“Innhmun sok mi chung in hnon mi 382 hna cu a tha bik in khua cu kan ruah te ko lai, a si nain atu lio cu mi harsa an tamtuk rih ca ah a si khawh chung in buaipi hmasa an herh. Hakha hi khuapi dawh taktak mi ah ser kan timh lio a si, thiamsang hna nih design an suai lai i cu ning in inn tha ka sak khawh ko lai a ti mi cu kan ruah te hna lai. Hi kong hi cu biapi a si rih lo ca ah hmai lei ah kan khante ding a si tiah achimchap.
Hi innhmun sok mi kong ah zeitik ah dah mee zuh a si lai ti cu a fiang kho rih lo. “Cung lei upa dih lak hna lecommittee hna tel in a tha a rem cang kan ti tik ah meezuh can kan thawk te lai, cun inn hmun a ngah mi paoh nih tangka cu committee te nih an khiah ning zat in an liam ve lai, asinain an liam khawh lo ding tiang cun liamter an si lai lo,” tiah Pu Ngun Vung nih a chim. The Hakha Post
