Hakha Sangthar samh mi cu minung (chungkhar) 467 nih an tinco i anmah le an hmun cio tuanvo ngeitu hna nih July 9 ah an zohpi hna lai, tiah kan theih.
“Hmun a tingco mi hna hi zohpi lo ahcun ri an i deet. Cucaah, phu 3 ah i then in July 9 ah kan zohpi hna lai. Fel tein hman an i thlak lai. Tanzaka asiloah thirhling in an i kulh cio lai i hmun ri kong ah an buai ti lai lo. Hi hmun kan phawtzamh mi hi cheukhat nih hmun an zuar tiin phundang in an kan hmuh. A ngaingai cu kan zuar mi a si lo. Hihi Pu Ngun San Aung (Minister hlun) le Pu Tha Peng (Deputy Director) nih fel taktak le tha taktak in an kan tawlrelpi mi a si. Lam an cawh, lung an phah, ti le mei tiang in an tawlrel mi kha anmah hmun a tingco mi ca a si tik ah a dihheu mi kha an liam ve bantuk khi a si. Hi hmun tawlrelnak ah hin company 12 bak kha a bathlaar in tuahter an si. Cucaah, hmun a tingco mi hna nih July 15 hlan ah tangkan an thawh dih lai i cham an si te lai,” tiah Hakha Peng Sipin Committee Chairman Pu Ngun Vung nih The Hakha Post ah a chim.
Tutan a voi khatnak hmun samh mi hi pe 100, pe 80, pe 60 le pe 40 tiin then a si pin ah 1st class, 2nd class le 3rd class tiin then a si rih i chungkhar 467 nih an tinco. A taang mi hmun dang zong August thla chung ah awngbali zuh a si than lai. Tutan ah hmun a tingco mi hna hi kum 1 chung hrimhrim ah thing-inn asiloah canphion inn zong in minung um khawhnak in an sak hrimhrim lai i a sa lo mi le a zuar mi cu chuh than an si lai. Cun, July 15 tiang ah tangka a pe tho lo mi cu chuh an si lai, tiah kan theih.
