Hakha Sangthar March thla chung ah kan phawtzamh cang lai: Minister Pu Soe Htet
Hakha ah Sangthar samh mi cu 2020 March thla chung ah kan phawtzamh cang lai, tiah Chin Ramkulh Cozah Chimphuannak Nawlngeitu Sipin Minister Pu Soe Htet nih February 13 ah a chim.
Hi Sangthar samh mi hi phawtzamh ding timh mi nicaan 2019 November thla chung ah phawtzamh ding tiah timhtuah a rak si nain a ruang tampi ruang ah phawtzamh khawh a si lo i March thla chung ah kan phawtzamh khawh cang lai, tiah atu bantuk in Minister Pu Soe Htet nih a chim hi a si.
“Hiti kan tlai deuhnak hi Pyidaungsu in ca a phanh rih lo ca ah siseh, cun, inn hmun pakhat le pakhat kar lam kan tuah i cheukhat cu lam a tlau mi a um i a thar in kan suaisam than ca ah a si. Cun, kapkhatlei ah Chin Miphun Ni zong a nai, Ramkomh Ni (Union Day) tuah timh tibantuk ah kan buai tuk. Cun, mahle department cio in khual kan tlawng dih lengmang i tuan ah kan phawtzamh khawhlonak hi a si. Inn hmun 727 zong ready a si cang ko. March thla chung ahcun kan phawtzamh khawh cang lai,” tiah Minister Pu Soe Htet nih The Hakha Post ah a chim.
Hakha Sangthar samh than mi hi a luancia 2019 August 20 ah Chin Ramkulh Cozah nih phungluutlo tiin a theh i a thar in a samh than mi a si. 2019 kum November thla chung ah phawtzamh ding timh tuah a rak si nain a ruang tampi ruang ah nihin tiang phawtzamh khawh a si lo i March thla chung ahcun an phawtzamh taktak cang lai, tiah kan theih.
