Hakha sakhung license cuhnak an tuah

Thla ruk chung ca Hakha sakhung license cuhnak cu Hakha Town Hall ah March 15, Zing 10:00 in 11:45 tiang tuah a si.
Hakha sakhung license cuh ning kong he pehtlai in Haka Sipin Committee Chairman Pu Ngun Vung nih, “Tutan Hakha sakhung license cuh ning cu ngamh zat kaa chim in i laan si lo in ngamh zat kha aho hmanh hmu lo ding in ca in tial a si lai i tangka zat tam bik tial mi sakhung license pek an si lai. Tangka zat tial mi palh sual ah remh khawh si lai lo,” tiah sakhung license cuhnak thok hlan ah a chim.
Tutan sakhung license a hmu mi hna cu Vaal Sang Hre Ling nih tangka 17,500,000 in Pyidawtha Vok khung, Pu Run Ceu nih sing 22150000 in Ral Dun (keihsi market) Vok khung, Pu Tial Thang nih tangka 20,600,000 in Ral Dun Sasen Khung an si tiah Pu Ngun Vung nih fehternak a tuah.
Hakhathar sasen khung cu aa cuh mi an um ko nain Hakha Sipin nih Hakha thar sasen khung ca tangka zat kiah mi nak tam an ngamh lo caah hmai lei ah license cuhnak tuah than ding in Peng Sipin lutlai Tam Aung Shing nih theihter nak a tuah.
“A dang sakhung license cuh awk um rih hnga mi cu Pyidawtha Sasen khung, Hakha thar Sasen khung le Hakha thar Vok khung an si,” tiah a chimchap.
Sakhung tlaitu le sakhung lei tawlreltu Sipin Committee karlak lungtlin minthuut mi ah cuai tling lo in sa zuar lo ding, cozah nih khiah mi man nak tam in zuar lo ding, ngandamnak a hrawk kho mi sathing le sathu zuar lo ding ti pawl aa tel, tiah theih a si.
Hakha sakhung license cuhnak ah motor ke man khawlhnak license cuhnak zong telhchih a si i Pu Thawng Soe nih tangka 2,700,000 in thla ruk chung ca motor ke man khawlhnak license cu a hmuh, tiah theih a si.