2020 party tling democracy thimnak ah Hakha pengkomh chung in palai a zuam mi cheukhat hna nih mi sawmnak caah tangka an hman mi zat cazin cu December 10 tiang ah a pe rih lo mi an um tiah theih a si.
Union Election Commission (UEC) zung nih November 10 in December 10 tiang caan an pek hna. Hi caan pek mi ni 30 chung ahhin palai pawl nih thimnak lio mi sawmnak caah tangka an hman mi cazin pek dih ding a si.
Hi kong he pehtlai in Hakha pengkomh commission zung riantuantu Daw Cho Khaing Oo nih, “Hakha pengkomh chung ah hin Pyithu Hluttaw hi 7 an um, an zapi in misawmnak caah an hman mi tangka cazin hi an pek dih cang, Amyota Hluttaw in palai 8 an si i minung 7 nih cun an hman mi cazin an pek cang nain pakhat a pe rih lo mi a tang rih, Pyine Hluttaw in a zuam mi palai hi minung 17 an si, hi chungah minung 13 nih an hman mi tangka cazin an pek cang, minung 4 an tang rih. A tang mi pawl zong hi December 10 ah rak pekter ding in kan auh hna” tiah The Hakha Post ah a chim.
2020 party tling democracy thimnak ah hin Hakha pengkomh chungin palai a zuam mi hna hi minung 32 an si i hi chung ah minung 27 nih an tangka hmannak cazin hi an pek cang, a pe rih lo mi hi minung 5 an tang rih tiah theih a si.
