Hakha Peng Palek Zung nih Surkhua ah sualtuah le tlaihhrem zor nakding cawnpiaknak an tuah

June 11 ah Hakha Peng Palek Zung Lutlai Yehmu Aung Yarzar Phyo hruai mi Hakha Peng Palek Zung riantuantu hna nih Hakha peng Surkhua khua mi hna sin ah sual tuahnak le kum tlinglo tlaihhremnak a zor nakding cawnpiaknak an tuah.
Cawnpiaknak cu Surkhua Baptist Church ah an tuah i khuami 150 hrawng an kai.
“Tu chan cu fimthiamnak chan a si ca ah mi kip nih phone i tlaih dih a si cang. Internet chung ah fimnak le hngalh kauhnak tampi a um bantuk in zoh dawh lo thil tampi an um. Cu nih cun sual tuahnak le kum tlinglo ngakchia tlaihhremnak le tlaihhremnak a karhter. Cu he pehtlai in i ralrin awk tete le a hlankan in hrial ningcang pawl kan cawnpiak hna,” tiah Hakha Peng Palek Zung Lutlai Yehmu Aung Yarzar Phyo nih The Hakha Post ah a chim.
Myanmar ram pumpi ah kum tlinglo ngakchia tlaihhremnak a karh bantuk in Chin ramkulh zong ah ton pah lengmang a si ve cang. Ram tampi nih kum 18 tang kha ngakchia tiah ri a khiah i Myanmar ram nih cun hman lio mi upadi ning in kum 16 a tling rih lo mi kha ngakchia ah a chiah hna.
Ram pumpi chung ah a cang mi tlaihhremnak hna lak ah zatuak 64% hrawng cu khuate ah a cang mi a si. Zatuak 13% cu minung (Tlaihhremtu) zumh tuk ruang ah a cang i zatuak 23% cu lemsoinak ruang ah a chuak mi a si. Hi kong he pehtlai in a hlankan in ralrin awk tete le minung chawlehnak, riithaisii kong tibantuk zong kan cawnpiakchih hna, ti zong Yehmu Aung Yarzar Phyo nih a chim fawn.
Hakha Palek Sakhan zong nih Bungzung, Lamtuk tibantuk khua pawl ah cawnpiaknak an tuah cang i khua a pau cun pehtlai in tuah an i tim. Hakha khuachung zong ah tuah ding in timhtuahnak an ngei tiah Hakha Peng Palek Zung in thawng kan theih.