2020 kum thimnak cu November ah tuah timh a si i Hakha Peng NLD Executive Committee (EC) nih Palai aa cuh ding mi minung 14 a chuahpi mi hna lak ah minung 5 cu June 12 ah an fehter cang hna, tiah kan theih.
Hi an fehter mi hna cu; Ramkulh Palai (Pyine) No. 1 ah Pu Zo Bawi, No. 2 ah Pu Sui Thio, Pyithu Hluttaw Palai ah Pu Tial Ling, Amyotha Hluttaw Palai ah Dr. Aye Aye Ngun le Pu Ngun Vung hna an si.
“Atu hi Hakha Peng NLD EC nih a kan taar mi lawng kan si rih. Hi hnu ah Ramkulh sin a phan rih lai. Cu hnu ah Ramkomh sin tiang a phan rih ding a si. Cucaah, atu an kan thim mi minung 5 hi tlamtling in fehter taktak kan si rih lo. Ka saduhthah cu hnu deuh ah chim te ko ning,” tiah Pu Zo Bawi (Atulio Hluttaw Speaker le Chin Ramkulh NLD Chairman) nih The Hakha Post ah a chim.
Ramkulh (Pyine) Palai in min taar mi atulio Lamsuul Minister Pu Sui Thio nih, “Pathian thawng in Palai ka tlin ahcun atu kan hmabaak lamsuul pawl hi ka siaherh peng rih. Tahchunhnak ah Thantlang lam hi pe 18 kau in tuah ding ti mi kha 2.5 billion bak an kan zuh ca ah kan tuah kho thai lo. Cun, Mindat le Matupi lamsuul zong a tha ngaingai rih lo. Gangaw lamsuulpi zong hi aa ngerhngawinak a tam tuk rih. Cun, Sipin lei in chim ahcun zu dawr pawl, motor le motorcycle chiah ningcang pawl, khualak workshop pawl, khualak zun-inn pawl le lutihor tibantuk hi kei ka zohsawh kho bak lo. Hi pawl tiang hin tharchuah than le thanchoter than ding hi kaa hmaithlak ko hnga,” tiah The Hakha Post ah a chim.
“Pathian nih lam a ka hruai i teinak ka hmuh ahcun, Hakha Peng ai-awhtu ka si lai ca ah Hakha Peng nih a herh bik an ti mi kha pakhatnak ah tuan kaa zuam lai. Fimcawnnak hrimhrim hi papek in kaa zuam lai. Tangka hrambunhnak ah zero a si peng mi Chinram hi tharchuah le thanchoter hrimhrim kaa zuam lai. Federal hi kan duh cio bantuk in 2008 phunghram remhnak kong zong ah tampi chimrel kaa zuam lai. Cu kong ah Tlangcungmi kan duhning le CNF/A hna duhning zong zohpiak thiam kaa zuam lai. Cun, mizapi nih kan huat bak mi ziknawh le eihmuarnak (corruption) hi fakpi in doh ka duh. Cun, mizapi nih kan buai peng mi pakhat cu, Hluttaw Palai hna hi kan tong kho bal hna lo, tiah mizapi nih an chim tawn. Cucaah, Hluttaw le mizapi pehtlaihnak tuanvo ngeitu (liaison officer) ka chiah lai i mizapi he siarem tein pehtlaih khawhnak ka tuah lai. Cun, Hluttaw meeting a dih tik poh ah keimah meehmun a si mi mizapi sin ah tonbiaruahnak ka tuah than lengmang lai. Cun, ka biatlaih pakhat cu, hruaitu ti mi cu hnuzultu tampi ngeih ruang ah si loin tinh mi pakhat cung ah fel tein, a caanhman tein, a herhning tein tlamtlinh le riantuan khawh hi a si, ti hi ka biatlaih a si,” tiah Pyithu Hluttaw Palai ca ah min taarchung mi Pu Tial Ling nih The Hakha Post ah a chim.
Hi kong ah Amyotha Palai thim ding in taarchung mi Dr. Aye Aye Ngun nih, “Pathian thawng in Ramkulh le Ramkomh nih an kan cohlan i teinak ka hmuh ahcun keimah le ka tlaih mi rian hi papek in ka tuan ko hnga. Cucu, fimcawnnak hi a si. Vawleipi level a phan kho ding mi fimcawnnak hi kan herh tuk cang. Ramdangmi Professors tiang nih ca an rak kan chimh khawh nakding biapi in kaa zuam lai. Cun, a dang chawhrawlnak siseh, nunphung kong ah siseh, a lamkip thanchonak zong ah a si khawh chung in kaa zuam lai,” tiah The Hakha Post ah a chim.
Hi kong ah Amyotha Palai in min taarchung mi Pu Ngun Vung cu kan pehtlaih lengmang in kan pehtlai kho lo.
Atu bantuk in Thantlang ah siseh, Falam ah siseh, Chin Ramkulh Peng 9 chung ah NLD Palai aa cuh ding mi Peng EC nih an thim cuahmah hna tiah kan theih. CNLD party le USDP party belte nihin tiang Candidates taarchung mi min cazin a fiang kho rih lo.
Thantlang Peng NLD Palai aa cuh ding mi hna hi; Ramkulh (pyine) in No. 1 ah Steven Van Bik, Salai Jacob Thang, Pu Thla Cung an si. No. 2 ah Pu Sui Kar Lian le Pi Ni Sui Lian an si. Amyotha ah Pu Henry Van Thio le Pi Sui Ca an si. Pyithu ah Pu C. Za Cung le Pu Van Za Li an si. Annih hi June 13 ni ah Peng EC nih thim ding an fehter te lai, tiah kan theih.
