A ra lai ding mi party tling Democracy thimnak ah khuami hna nih mee cazin fawizaang deuh in an theih khawh nakhnga kong he pehtlai in Hakha Peng, Election Committee le Hakha khuachung CSO, Media hna cu 2020 July 6, State Election Commission Zung ah tonbiaruahnak an tuah.
Hi ton biaruahnak ah mizapi lei nih Hotline system in thimnak kong he pehtlai in a herhbau mi pawl, thimnak he pehtlai in theih a herh mi pawl fawizaang in, Commission in kan theih khawh nakhnga, Online system in mee ngeitu hna nih min kan pek khawh nakhnga tiin biaruahnak an tuah.
“Mee a ngei mi mizapi hna nih mee cazin chung ah kan min aa tel le tel lo timi fawi deuh in an theih khawh nakhnga zeitindah kan tawlrel lai, Media le CSO he i fonh in zeitindah rian kan tuan ti khawh lai ti hi a biapi taktak. Cun, mee pek khawhnak nawl a ngei ko nain mee cazin ah aa tel lo mi hi an um pah tawn. Hi hna ca ah zeitindah kan tawlrel lai ti hi a biapi taktak mi a si ve,” tiah Chin Ramkulh, Election Commission Zung Secretary Pu Lin Kyaw nih a chim.
Thimnak hi a ni caan aa duh pah rih ko ca ah rian ngei upa lei nih Peng in siseh, pengkomh in siseh mizapi sin ah chimh cawnpiaknak le a dangdang zong tuah an i tim tiah thawng kan theih.
June 30 tiang mee pe kho ding cazin an lak mi ah ,Hakha Pengkomh (Hakha le Thantlang) chung ah mee pek khawhnak nawl ngei minung 72,450, Falam Pengkomh ah minung 39,412, Mindat Pengkomh ah minung 30,237 hna an si tiah Election Commission nih a langhter.
Hakha Pengkomh, Falam Pengkomh, Mindat Pengkomh i mee pek khawhnak nawl a ngei tiah an thanh mi hi a fek rih lo June 30 tiang min cazin an lak chung mi a si.
Hakha Peng thimnak lei nawl ngei upa Pu Thla Kio nih, “Tutan thimnak ah mizapi nih mee tha te le tluang tein an pek khawh nakhnga kan tawlrel lai. Thimnak ah mee kan pek mi hi kan ram ca ah siseh, kan miphun ca ah siseh, kan khua ca ah siseh a biapi taktak mi a si. Cu a si ca ah a si khawh chung in mee hi pe ko hna usih,” tiah a chim.
2020 Myanmar ram thimnak pi cu a ra lai ding mi November 8 ah tuah a si lai i, atu lio Chin Ramkulh Cozah a kan hruaitu Minister a tam uu zong an i zuam than lai. Cun, Hakha khuachung ah mee cazin zong August zarh hnihnak a si lo hmanh ah zarh thumnak ahcun mizapi sin ah an langhter cang lai tiah thawng kan theih.
