Hakha peng chung ah ningcang lo in tangka kawlhawlnak a phunphun a chuak mi kong he pehtlai in CDF-Hakha Central Council nih March 9 zaan ah ralrin peknak ca a chuah.
CDF-Hakha Central Council nih ralrinpeknak ca a chuah mi cu a tanglei i kan langhter mi hi a si:
1. CDF-Hakha Central Council cu mizapi dothlennak chungin a chuakmi kan si bantukin mizapi dothlennak a dertertu cawlcanghnak a simi hna uniform le hriamnam he zurit le buai, mizapi le hruaitu pawl hnahnawhnak pek, kutthlak, hramhram in tangka hal, thihphaih, thil man a kaitertu ngunkhuai lak, ral a si aipat tin a chungkhar le hawikom tiang hnahnawhnak pek ti bantuk vialte nihin tiang kan hrial i mailei zongah tuah loin mizapi nih lungthote le lungnuam tein an kan dirkamh khawhnak caah kan i zuam lai Cucaah rian kan tuan ah siseh, tangka kan kawl ah siseh, sang/khua uk hna tiang theihpinak in ningcang tein kan kal.
2. Tuhrawng ah Hakha khuachung ah siseh, khuate lei pawl ah siseh, kanmah theihpinak tel loin tangka hal, ngunkhuai lak, rianfial tibantuk a tam ngai ti thawng kan theih. Cu bantuk ruangah mizapi hna lungrethei le thinphang in an um. Cucaah mizapi a rungvengtu kan si bantukin cu bantuk a tuahmi an um ahcun kan theihter ulaw kan tlaih hna lai i phung ning tein dan kan tat hna lai.
3. Chinland Council nih siseh, CNF/A nih siseh, cu bantuk tuah an duh ahcun riantuanti kan si bantukin an kan theihter hmasa lai i a herning in kan i bawnh ko lai caah kanmah theihter hmasa loin thil a tuahmi paoh cu dotla lo an si.
