Hakha Peng chung eidin dawr, lakphak dawr le dawr chung ah thut a hau mi dawr pawl hna cu a tanglei zulhphung an ser ning in a zul mi pohpoh dawr honter than an si lai, tiah Hakha Peng Sipin Zung nih June 3 ah The Hakha Post in an langhter.
COVID-19 ruang ah Hakha Peng Sipin Zung nih dawr chung ah thut a hau mi eidin dawr le lakphak dawr hna cu Parcel lawng in zuar ding le cawk ding tiah an rak thanh. Dawr riantuan in a paw aa cawm mi hna le dawr tuah in a paw aa cawm mi hna tampi harnak an ton hlei ah zulhphung a zul lo mi zong theih an si. Cucaah, a tanglei zulhphung ning in a zul mi pohpoh dawr honter than nan si lai.
Dawr ngeitu hna le dawr riantuantu hna nih zulh ding mi cu, (1) Dawr luhnak innka hram ah kut tawlnak Hand Gel chiahpiak ding. (2) Dawr chung cabuai ah a eiding ding mi minung pakhat le pakhat karlak khampiak ding, Partition hi Ngandamnak le Zaanglek Zung nih zulhphung (Guide Line) ning in tuah ding. (3) Eidin a zuartu, a tuahtu le a petu tibantuk zong hmurhuh i huh ding. (4) COVID-19 zawtnak hi hmelchunhnak a langh lo zong ah zawtnak i chonh khawh mi a si kha hmuh khawh a si. Rawl chumtu, rawltuahtu tibantuk zong Ngandamnak le Zaanglek Zung nih fimchimhnak a tuah bantuk in a herh ning in cheknak tuah ding. (5) Dawr luhchuahnak hmun ah COVID-19 kong he pehtlai in i runven ning fimchimhnak ca le signboard tar ding. (6) Hmurhuh huh loin dawr ah a ra mi pohpoh dawr luh lainak ah hmurhuh a man hman tein cawk khawh nakding in tawlrelpiak ding.
Dawr ah a eidingtu hna zulh ding mi cu,(1) Dawr ah a eidingtu hna nih hmurhuh i huh ding. (2) Dawr ah a eidingtu hna nih, dawr ah a eiding tik ah zulh ding mi pohpoh kha Ngandamnak le Zaanglek Zung nih fimchimhnak a tuah bantuk in zulh dih ding.
Eidin le lakphak dawr hna nih Ngandamnak le Zaanglek Zung nih zulhphung a ser bantuk in timhtuahnak caan ni 10 pek an si lai. Cu hnu ah a tlamtlin le tlamtlin lo kha zohfel an si lai i, a tlamtlin ahcun dawr hon than ding in nawl pek an si hnu ah, Ngandamnak le Zaanglek Zung a dang tein zulhphung a serpiak than te hna lai.Cucaah, Hakha Peng Sipin kulh chung ah a um mi eidin dawr le lakpak dawr pawl dawr hon than nan duh a si ahcun, Ngandamnak le Zaanglek Zung nih 20 May 18 ah a thanh mi zulhphung le a cunglei in kan langhter mi, dawr ngeitu le dawr ah riantuantu hna nih zulh ding le dawr ah a eiding mi hna nih zulh ding kha tha tein timhlamh cia dih hnu ah Hakha Peng Sipin Zung ah dawr hon than ding in sok ding le a sok mi pohpoh tuanvo ngeitu hna nih zohfelnak an tuah than lai. A tlamtlin ko ahcun dawr honter than nan si lai i, a tlamtling rih lo mi tu cu hlan bantuk in Parcel lawng zuarter nan si rih lai, tiah Hakha Peng Sipin Zung nih The Hakha Post in fiangternak le thawngthanhnak an tuah.
