2020 November 8 ah tuah mi Myanmar ram thimnak, Hakha Peng chung ah ningcang loin mee a thla mi minung 6945 an um tiah ralkap nih a thanh i, hi kong ah Chin Ramkulh, Election Commission zung lei nih zohfelnak tuah than an timh tiah theih a si.
Hi kong he pehtlai in Chin State Election Commission zung Lutlai Pu Uk Nawl nih, “Kanmah leikap nih cun hi kong ahhin UEC lei nih cu tiin tuah uh, kha tiin tuah uh ti cu a um rih lo. Mee thlak mi aa thuat mi zong a um kho mi a si ko. Kanmah lei nih cun kap hnih in zohfel than ding cu timhlamhnak kan ngei ko,” tiah The Hakha Post ah a chim.
“Atu ralkap lei nih an thanh mi hi a dik mi zong a si kho bantuk in a dik lomi zong a si kho ve mi a si ko tiah kanmah lei zong nih kan tuaktan mi a si ve ko,” tiah Pu Uk Nawl nih a chimchap.
Ralkap nih an thanh mi chung ah Hakha Peng chung in mee aa thuat mi mee hi a dihlak ah mee 3855, ningcang loin mee an thlak mi 3090 a si i, dihlak fonh mee 6945 a um tiah aa tel.
