Chin Ramkulh chung ah COVID-19 zawtnak a chuah ka 2020 March 23 in 2021 January 15 tiang ah Hakha Peng chung in COVID-19 case he tazacuai mi le dantat mi an dihlak ah minung 26 an si tiah Hakha Peng, Penguk Zung Lutlai U Myint Oo sin in thawng kan theih.
“COVID-19 zawtnak a chuah hnu Hakha Peng chung ah COVID-19 case in kan tlaih mi, dan kan tat mi le taza kan cuai mi hna hi a case in 18 le a minung in 26 an si. Atu tlaih mi le tazacuai i dantat mi hna hi an dihlak in zulhphung ser mi an zulh lo ca ah upadi pohma 25 in case tuahpiak an si,” tiah Hakha Penguk Zung Lutlai U Myint Oo nih The Hakha Post ah a chim.
COVID-19 case hi kokek harton upadi pohma 3 le pohma 25 in tuahpiak an si. Upadi pohma 3 hi mask i huh lo ruang ah tlaih mi an si. Cun, upadi pohma 25 hi a thlithup in rikhiah mi ram chung ah lutchuak mi an si.
Atu Hakha khuachung ah COVID-19 zawtnak kong he pehtlai in Facility Quarantine Center ah erhkhumh mi minung 381 le Home Quarantine ah chiah mi minung 122 an si. COVID-19 runvennak ca ah Facility Quarantine chiah mi hna hi an dihlak in Cozah lei nih bawmhnak pehzulh in a pek rih hna tiah kan theih.
